Alferrak, pasotak, bordeak, indibidualistak, matxistak, drogosoak… Halakoak
al gara? Guk geuk ba al dakigu nolakoak garen? Zer nahi dugun?
Hainbat dira eguneroko bizitzan gazteoi sortzen zaizkigun kezka eta
kontraesanak. Norbanakoaren jarreratik hasita, elkarren artean mantentzen
ditugun harremanak eta gizartearen ikuspuntu ezberdinak ezarritako molde eta
presioen barruan gaude, “helduen” gizarteak ezarritako molde eta presioak hain
zuzen. Bada garaia gazteon kontuetaz gazteok hausnartu dezagun.
Azpimarragarria da egungo Alde zaharreko errealitatea. Bilboko erakuslehio
turistikoa eraiki nahiean udaletxeak auzotarron eta are gehiago gazteon iritzia
errespetatzen ez duen auzo eredu bati erantzun dio. Bilboko gune komertzial
garrantzitsuenetakoa izanik gazteoi eragiten diguten aspektu ugari ditugu
muturren aurrean. Kontsumismoa, patriarkatua, lan prekarietatea, kontrol
soziala, adierazpen askatasun eza...
Guzti hau salatu eta honi buelta ematen saiatzeko gazteria kritiko eta
kontzientziatu baten beharra dago, 7Katu gaztetxea horretarako tresna ezin
hobea dugularik.
7 Katu gaztetxeko eguneroko lana, Alde zaharreko gazte eragile berriak,
Gazte eguna... Alde zaharreko gazteok ez dugu denborarik galdu azken urteotan,
eta gero eta gehiago batuz joan gara, ekintza ezberdinen bitartez eta
elkarkanean bizitako proiektuei arnasa emateko. Baina orain beste pausu bat
ematera goaz.
Gazteak nolakoak garen eta guk nahi dugun gizartea irudikatzeko kapaz
garela erakutsiko dugu. Horretarako aukera garrantzitsua dira Ekainaren 28, 29 eta 30ean egingo
ditugun Alde Zaharreko Gazte topaketak.
Gure artean antolatu eta kezkak trukatzeko, kontraesanak aurkitu eta
eztabaidatzeko, ikuspuntu kritiko bat eraikiz eta disfrutatuz elkar hobeto
ezagutzeko... Gazte izateaz harro sentitzeko!
Animatu eta parte hartu Alde
Zaharreko Gazte Topaketetan!
EKAINAREN 28, 29, ETA 30an
SENTITU, PENTSATU,
OKUPATU... IRAULI!
Ekarri lozakua eta esterilla!
